- दुर्गा प्रसाईं राजसंस्था पुनर्स्थापनाको माग गर्दै आन्दोलनको घोषणा गरेपछि पक्राउ परेका छन्।
- प्रसाईंलाई हिंसा भड्काउन सक्ने आशंकामा भक्तपुरबाट पक्राउ गरी काठमाडौं प्रहरीको हिरासतमा राखिएको छ।
- पक्राउ परेका प्रसाईंमाथि राज्यविरुद्धको कसुर, आपराधिक उपद्रव, कर्तव्य ज्यान लगायतका मुद्दा छन्।
- काठमाडौँ । राष्ट्र, राष्ट्रियता धर्म–संस्कृति र नागरिक बचाउ महाअभियानका संयोजक दुर्गा प्रसाईँ आफ्नो अभियानका कारण कानुनी झमेलामा पर्दै आएका छन् । बैंक र लघुवित्तको चर्को ब्याजदरको विरोधका साथसाथै तिनै बैंक, लघुवित्त र सहकारी पीडितलाई सङ्गठित गरेर आन्दोलन समेत गरिसकेका पछिल्लो समय प्रसाईँले राजसंस्था पुनर्स्थापनासहितका २७ बुँदे राजनीतिक माग अघि सारेका छन् ।
उनको आक्रामक अभिव्यक्ति र हर्कतका कारण उनी एक वर्षको अवधिमा पटक पटक पक्राउ पर्दै छुट्दै आएका छन् । क्यान्सरका बिरामी समेत रहेका प्रसाईँ तत्कालीन प्रधानमन्त्री केपी शर्मा ओलीले कम्बोडियामा लगानी गरेको विवादास्पद अभिव्यक्तिपछि एक वर्षअघि पक्राउ परेका थिए । त्यसपछि उनी विभिन्न पक्राउ पर्दै छुट्दै आएका छन् ।
गतवर्षको मंसिर ४ गते मेडिकल व्यवसायी समेत रहेका प्रसाईँ भक्तपुरस्थित आफ्नै घरबाट सीआईबीको टोलीबाट पक्राउ परेका थिए । उनले आफ्नो साङ्गठनिक गतिविधि सुरु गरेयता उनको त्यो पहिलो गिरफ्तारी थियो ।
पक्राउ पर्नु केहीदिनअघि प्रसाईँले ‘फेक डकुमेन्ट’ को सहारामा ओलीविरुद्ध दुष्प्रचार गरेका थिए । सो अभियोगमा उनलाई काठमाडौँ जिल्ला अदालतले ४० हजार धरौटीमा रिहा गर्ने आदेश गरेपनि सो पुनः पक्राउ गरे । विद्युतीय कारोबार ऐन–२०६३ अन्तर्गतको कसुरमा धरौटी बुझाएपनि उनीविरुद्ध आपराधिक लाभ सम्बन्धी कसुरमा समेत अनुसन्धान भइरहेको हुनाले पक्राउ गरिएको थियो ।भारतीय गुन्डा नाइके लरेन्स विश्नोइको नाममा नेपालका व्यवसायीलाई धम्क्याउन उनको पनि हात रहेको आरोप त्यतिबेला लागेको थियो । सोही प्रकरणमा उनको केही सहयोगी पनि समातिएका थिए ।
तर, उनी सर्वोच्च अदालतको आदेशपछि पुस २७ गते रिहा हुन सफल भए । उनीविरुद्ध सम्पत्ति शुद्धीकरणसहितका अन्य केही मुद्दा पनि चलेको थियो ।
कानुनी झमेलका बिच आफ्नो अभियानलाई उस्तै शैलीमा अघि बढाएका उनी राजतन्त्र फर्काउने उद्घोषका साथ आन्दोलनमा लागे । सोहीअनुसार २०८१ चैत १५ गते उनी नै कमान्डर बनेर राजधानीको तीनकुनेमा प्रदर्शन भयो । उक्त प्रदर्शन हिंसात्मक बनेसँगै उनी पुनः पक्राउ परे । दुई जनाको ज्यान जानेगरी भएको घटनापछि भागेर भारत पुगेका उनी चैत २९ गते पक्राउ परे ।
प्रसाईँलाई भारतबाटै नेपाल ल्याइएको स्रोतहरूले बताएपनि नेपाल प्रहरीले भने झापाको भद्रपुर क्षेत्रबाट नियन्त्रणमा लिएको दाबी गर्दै आएको छ ।
नेपाल र भारतबिचमा सुपुर्दगी सन्धि नभएकाले एकअर्काको देशमा पक्राउ परेका आरोपितहरूलाई अनौपचारिक रूपमा लेनदेन गर्ने अभ्यास रहँदै आएको छ । अर्को देशमा पक्राउ परेमा त्यहाँको प्रहरीले सीमाक्षेत्रमा ल्याएर छोड्ने र लगत्तै सम्बन्धित देशको प्रहरीले जिम्मा लिएर गन्तव्यमा पुर्याउने अभ्यास रहिआएअनुसार प्रसाईँको हकमा पनि सोही भएको बताइन्छ ।
पक्राउ परेपछि अदालतले उनलाई जेठ ३० मा पुर्पक्षका लागि थुनामा पठायो । प्रसाईँ विरुद्ध सरकारले राज्य विरुद्धको कसुर, आपराधिक उपद्रव, कर्तव्य ज्यान, ज्यान मार्ने उद्योग, सङ्गठित अपराध र एकीकृत कसुरमा सजाय हुन मागदावी लिएको थियो।
तर, गत साउनमा उच्च अदालत पाटनले धरौटीमा छाड्ने आदेश दिएसँगै उनी डिल्लीबजार कारागारबाट छुटे ।
उच्च अदालतबाट राजावादी आन्दोलनसँग जोडिएको मुद्दाका साथै बैंकिङ कसुर दुवैमा उनलाई धरौटीमा छाड्ने आदेश भएको थियो । कारागारबाट छुटेपछि पनि आफ्नो अभियानलाई निरन्तरता दिएका उनी जेनजी आन्दोलनबाट समेत देशले निकास पाउने स्थिति नबनेको भन्दै सरकारको विरोध गर्दै मंसिर ७ देखि आन्दोलनमा जान लागेका थिए । तर, उनी त्यसअघि नै पक्राउ परेका हुन् ।
